رعب اليالى الاخيرة

رعــب الليالي الأخيرة

فـــوزي ومــاهر وأحـمــد خضــر
حيــــــدر ومتــــولي وعريــــــان
توفيق وحــامد، ومــا هوش سر
عندك عشان مــا انساهش هشام
وعبــده عبــاس وأختي أمــــال
سيد نـــدا - الصيرفي الإنسان
يحـــيي، وفطايري وكـــامل المر
عـفـــواً يــا أصــــحابي الشــــبان
دول بـــــاقي قطفـــة طـــول العمر
صـــحبة رضــا القلــب القلقـــــان
راح تعمـــل إيــه طب مـن غيرهم
والمـــوت محاصـــــرهم طمعــــان
بيجَــــردك مـــن بشـــــــــــايرهم
ويجرُعـــــــــــك عنهم أحــــــزان
ويقلقــــك علـــي مشــــــــاعرهم
وكأننــــا أطفــــال صــــــــــــبيان
الرعـــــب مــن فــضُ ســــامرهم
بيجلــــدك غربــــة وأحــــــــــزان
ميَــــت قتيـــــل علــــي مصايرهم
مـــن قبـــل مـــا تضـــمك أكفـــان

حكمه، ورد غطاها
مــن يوم حكمها بيكفه النـدل والسفـــــــــاح
الجبـــن كــــان نعـــمه تاريخية .. للـفــــلاح
لـــذا احتمــالهــم همــوم حيٌة علي كتوفــــه
مـــن عهـــد خوفـــو لكدبـــه رائد الإصـلاح

***
فهمها واضحة..البحر مقتل للي مش سباح

عمـــال تبـــرر سياســـة الطاغــي وتحللها
دي ليلـــه ســـودا وباينـــه مـــن أولهــــــا
مش دا اللي يوم استوي ع العرش يا دكتور
قال غصُب عني يا تــــور يا دوب ح أحبلها

**
وغصب عنا وعنها ركبنا واستهبلهـــــا

صور كارتونية

صور كارتونية

ح تلاقي الدودة وطرح ما تطيب الثمارات
وتموت الحكايات حين يبقي الجهل شجاعة

قاعد زى الدرفيل المتملح
علي شط الشرم
بيحضر عفاريت الصمت
الخرسا
ودفاتر تفسير الهمسة
المكتوب بحبر الزمن الميت
في عروقه
هربان من صيادين الأشباح
والحيوانات المنقرضة التاريخية
الطالعين مع أساطير الرعب
الأمريكانية
وواحدها جد الجد .. بجد
يوم عن يوم
كل ما بيعجزٌ شعره بيسود
من قلة ما بيقلق علي حد
أو بتعب لجل يلاقي للأسئلة
اللي بتخطر علي باله
بمحض الصدفة
أيها رد
ولأنه ما قراش في حياته
رواية
ولا شغلت باله
غرابة أي حكاية
عمره ما اهتزت
شعره من أشواقه
لقصيدة شعر
أو هقهق من قلبه لنكته
أو خد راحته
وأرأ ويٌا أصحاب علي غلطة
مافرحش لُدش يجي له
في زنقة طاولة
ولا همة مسكه يك
لأنه زى اللي قاعدين زيه
علي شروم و شطوط
كان في الابتدائية
زغنطوط ودهل
وفي الثانوية جعر عتل
لكن مزبوط
عمره ما خرج عن هامش
أو عيط من الجوع
وان كان غمٌس ياما
رغيف الحلبة الناشف
واستطعم عجوة غيره
في السر
خوفا أيده تطول
ابعد من مناخيره
مار فعش أيديه في الفصل
يجاوب أي سؤال
مع انه شاطر ومذاكر
كل الإجابات
رعبا من أن لسانه
يطول أبعد م المطلوب
أو يجمع اكتر م المحسوب
أو يطرح أقل من المكتوب
لذلك ما كانلوش أصحاب أولاد
ولا حتى بنات
عمره ، - ملامحه ما عرفت
تقرا مشاعره
أو تتهجي أحاسيسه
بأي لغات الإنسان
لما بيغضب يكتم ومايقولش
ولو يتنرفز يسكت هس
يمكن علشان في صباه
فقد الدهشة
أو فقد الحس
وروض نفسه علي النسيان
ما سمحش لهواجيسه
تلعب في ترابيسه

عاش زى خطوط الطول والعرض

عاش زى خطوط الطول
والعرض
وهميه علي وش الأرض
روحه متشعلقة
غصبن عنه في السنجة
زى الترماي
لكن عاش عافق أعطافه
وحافظ أول أخر أعرافه
لجميع فتحات جسمه
حسابات ولسان
لذا كان متأكد
أن الشجر أن يعطش مات
والحظ إن لطش
ما ح تنفعش معاه
قرايات ولا كتابات
وان شطحت بيه أحلامه
يشوف نفسه مدير يا سفير
فأتعود مدٌ الخطوة
علي قد الخط
تمام بالضبط
علي سركي الظبط الربط
ومهما الدنيا تنشال تنحط
عمره ما هاج ولا زرٌ عليه
عرق الدهماء المنحط
اللي بيخلي المهزوز يشتط
والمحموق يتبط
والاستك
مهما يخستك يتمط
ولذلك رضيت عنه
جميع الأطراف
فأتقدم علي مهله
واترقي من غير ما يخاف
علي مهلك توصل أسرع
اتمتق علي راحتك
بالكلمة زى اللقمة
وأتمتع
إن جت لك فرصة اطلع
من غير ما تتغر فتطمع
خاف من جهلك لكن
ما تتهزهش فجاه
يتشد الخيط ينقطع
حلقة في ودنك
اللي ح يضحك في الأخر أجدع
م اللي بيضحك علي طول
واللي ح يفضل حتى لوحده
هو الأشجع
علشان كده قادر يتنطع
ع القمة لوحده ويتربع
متثبت في زمانه
مش همه المجهول
متبت بمكانه مستقطع
زى الدرفيل المتملح
علي شط الشرم
من رأس الحكمة لديلها
يطرقع في صوابع رجليه
علي راحته
ويتمطع

حكمه شبه شعبية
ومهما بليتنا بالجيوش الحرس
وحــاصرتنا بتكنولوجيا الخرس
أزاي ح تفلـــت من هدير الكــلام
في عز المنام يفزعك ميت جرس
***
مافيش لجام يكتم صهيل الفرس

فض السيرة

فـــض السيرة
بتكتـــب إيـــه يا ما كتبنــــا
الجهــل ونعيمــه غلبــــــنا
والكــدب خــرب أعاتبــــنا
غـــدر الزمن ده مش عادي

*
عــادي يعاديــــنا أعداءنـــا
يقطعـــوا حبـــل أرزاقــنـــا
ويلخبطـــــو لنا ألف باءنا
علي لحن كــاره ومعادي

*
لكـــــن الأهالي وعصابتهم
بعد ما فاحـــت فضيحتهـــم
عايزينا ندخل في طاعتهم
من بعـــد ما قلبـــوه نــــادي

*
ويا ريت بيفهموا في الكورة
أو كان لهم هيئه وصـــورة
عمــر العيــون المكســورة
تستطعـــم الـــذل زبـــادي

*
حدوتـــه بايته ومكـــرورة
من صنع طبقــة معـــدورة
طــرح الثقافــــة المغرورة
فرسانها عتريس و هنادي

*
كتـــابها ماتــــوا في ذواتهم
متسلسلين في حساباتهـــم
قطر التاريخ صفر فاتهـــم
فرموني حرموني أولادي

*
ح تندب أيه ريح قلبـــك
الخونة عفقوا رقب شعبك
وصبح هوي الأوطان ذنبك
ما تنكروش خليك هادي

*
لا فيه حكومة ولا معارضه
ع الجثة كله ديدان قارضة
ومنين أجيب أشعار ترضي
دمي مش حبر رمادي ؟

اعتراف
شــيوعي لكن مش في الحزب
عشــان صحاب الخيــر ماتــوا
والمحــدثين خنقـــوه بالكــدب
وكــفــنــوه بنكسارتـــــه

*
بزنس بقي جعجعة وكلام
واتولي كــداب الزفــــة
وكل من كان همة بكــام
ع الموجة عام عكم الدفة

الحزب بقى منتج افلام

الحزب بقــي منتج أفـــلام
كوميديا ومغامرات هبلــه
بمقالة يهزم جيش فانـــدم
وعوافي ع الطبقة العاملة

*
والمخرجة ربابة الصوبـة
كادرايه في الأمن طليعــي
سنيـــن تجهـــز لمصيبــة
ح تدبحه بمــوته طبيعــي

*
والمنتج اللي في الصورة
بقي عمدة الهضبة الوسطي
واستكفي بقميص الشورى
علي المعاش خبرة واسطي

*
سيناريو غبي عره وبايخ
والخيبة قال ذنب السوفييت
نقيصة في الطبع الماسخ
بتمدوا بـره وتنسوا البيت

*
من بعد صدام طالبانــــي
يروح العقيد بيجي عمه الصول
وتلحنوا الكدب أغانـــي
لكل لطخ عتل وغـــول

*
نسيتوا أصل النظريـــة
الإنسانية مش تجهيــز
ولا المناضلين حراميـــة
وعرا يا غاوين التأميز

من نهنهات المشيب

ح تحس بالذنب يوم ما أموت وتخسرني
ياللـــي عملت البدع من أجل تقهرنــــــي
أنا اللي خدت الوطن فرش وغطا ولحاف
أزاي أخاف من عويل غرضه يصغرني

****
لـو علة تكسرني شعـــري حبيبي يجبرنــي

عتبك علي ميـــن إذا كان الأمين خانـــــك
والقاضي خد عرقه من دمك ودكانك
اللي أنت لحنته نشز واللي شفته سراب
في سوق كلاب غل بتقرمش في وجدانك

***
يا نيل يا سيل دمعتي، نبلك ف أحزانك

دعوة الظالم

دعوه الظالم
يارب انصرنا علي الكفرين
نجينا من الظالمين
خلي الريال أتنين
استر عرض بناتنا
حنن قلب أخواتنا اغفر نزواتنا
نجح أولادنا الخابين
لا تحشرنا مع المتاعيس
كرهنا في الفسافيس
ابعد عنا وسواس إبليس
افتح لنا عاصي الترابيس
هدي أخلاقنا روٌقنا
سلك سكة أوراقنا وأرزقنا
علي مراتبنا وأغنينا
سهل مشاوير خطاوينا
إسندنا لو مالت بينا
فكرنا إذا نسينا
افتحها علينا ونجحنا
تعبنا ريحنا حزٌنا فرٌحنا
حنن قلب ولاة الأمر علينا
انصرنا بعز أفندينا
وبحق نبينا حرر أراضينا
فرج كربتنا وزود غلتنا

ملكنا أراضي أعادينا
افتحها علي أيدينا
عز بنا الإسلام

ذل بنا الكفرة وألاروام
أوهبنا الأختام
واجعلنا من أصحاب الأحكام
نرفع راياتك ونرتل آياتك ..
حنصوم ونزكي ونصلى
نكنس في حبك حوش السيدة والمتولي
نذكر نعمك نشكر بركاتك
ياربنا يا متجليٌ
خلي اسمك علي طرف لساناٌ .. تملي
نفكر بيه الناسيين
أحشرنا مع الواصلين
وياك في الجنة
اللي وعدتنا بيها يوم الدين
داحنا الأمة اللي ح تباهي بيها الناس
فاكفينا شر الخناس والدساس
واحمينا من الشيطان الوسواس
اللي مربع ومتيت في قلوبنا
قالب مقلوبنا
معلق في رقابينا ذنوبنا
فنحس إننا مع أننا .. توبنا
مكتوبنا إننا
م المغضوب عليهم والضالين
مش واردين علي جنه
ورايحين في أبو نكله – غصبن عنا

خير الأمم
الله يبارك خطاويكم إلي فلسطين
من دوله لقيطة علي المحارة بطين
فقست وصبحت بحكم المرجلة تنتين
إذا غزة للحمساوية للفتحاوة جنين
أحدث دول كالأمبيا تقوم ف رفٌه عين
أخر المتممة نلاقيها سلطنات ألفين
كلن لوحده ولاية حاكمها علي كيفه
لو حب يوهبها ضيفه تليق بكرمه زعيم

****
الله أكبر تعالوا نصلي لكي ننحر
أجمل طباع العرب في اللمة ع الأنجر
نخلط عرقنا بلحم أعداءنا ونكبر
ومش مهمين يكونوا مين – بلاش تفكير
أس الأساس .. م النجاسة الأرض تتطهر
إذ اللي مش مننا غُنْم لنا مقشر
هذي بداية الإيمان والطاعة للمولي
علاولا ... تبقي الشهادة عبادة ومقدر

****
ما هي الحياة امتحان والكل فيه ساقط
وأنا مش ح أعشها غشم وأنا ضهري للحائط
هذا أوان الانقسام فتعالي نتلابط
مكتوب لنا غيب هوان . كلنا الطبيخ شايط

دمانا ميٌة .. وتاريخنا في العموم هابط
وما عادش فيها ملام وشعبنا م العايط
اعتدنا عيشة الحرام ومعاشرة السكاكين
مساكين كلتنا الفضيحة ياحضرة الظابط

****
لا حول ولا قوة جيبتوا الفرقعات دي منين
رغم الحصار والمرار واليتما والمساجين ؟
دا ورث عرفات دا أصلا ولا ورث رابين ؟
سوا كنتوا حركة تحرر ولا كهنة دين
آكلين وشاربين وشايلين السلاح قابضين
في رطان طويل المدي يطرطش يسار ويمين
م النكبة للنكسة وصلتونا للوكسة
في ريح معاكسة بتهرس همَة المجانين

****
وسواء حكمها الغراب ولا أبوا الأنياب
الأمهات والبنات شربوا العذاب أنخاب
خدنا عليها كده في أرضنا أغراب
لأنه ما في بشر أردي من الأعراب
قالها زمان ربنا – يوم افتكرنا – بكتاب
وفاتنا أمة غنم لم نفهم الأسباب
لا خير فينا ولا فيه جدوى لوجودنا
سقوطنا رهن بصمودنا ف عركة الإنجاب

دمانا مية

على قفا مين يشيل

علي قفا مين يشيل
فيه جايزه عايزة اجتهاد
و جايزه عايزة اعتماد
و جايزه لجل العناد
تتم بيه المسخرة

*
جايزة لشاعرنا القليط
علشان ساعات بيكون شريط
لبديع الوهم الحويط
عمل عبيط يعمل مرة

*
ما يهمهموش تطلع عينيه
ولا مين يبيعه ومن شاريه
علشان يكون مرضى عليه
يلحس بلاط المندرة

*
يطلع كده ويدور كده
ف العتبة غير في السيدة
أصل اللجان دي معقدة
والتقل جاي لساه ورا

*
لذا ضروري يكون خدوم
رهن الطلب ساعة اللزوم
لو حتى قلعك الهدوم
ريَس لجانها السكرة

*

قرار إتهام أول
الحزب مات
اغتيل قتل
من كام سنة
مات واندفن غريب وحيد
من غير كفن
ما فضلش منه غير رفات
وبواقي من لحمه ف خرابشكو
قديمة معفنة
ياللي رقصتم فرحانين
يوم خرجته
ودبحتوا بعض علي الميراث
يوم دفنته
ووهبتوا راياته لعدوه
في أتون المحزنة – ذلة وركوع
مافضلش غيركوا يا كدابين
هذا الذي كسره لحساب المخبرين
ودا اللي عصره للعسس والبياعين
ودي اللي أكلت كبده غل وزعرنة
لحساب صاحب تارها القديم
الحزب مات في أيديكو عمد يا نصابين
مات واتخنق
وفضلتو ع الدكة الزُلق
متربعين تمثل سكات ديدان علق

نسوان ورجالة

نسوان ورجاله شلق
الدم أيديكم ما بيرو حش بغسيل
ولا تاريخنا نهيبة
للي صدفة عابرين السبيل
نسل المخاليل الخلق
ما يجوزش للقاتل يشيل اسم القتل
ماتطلبوش المستحيل
دا دم شهدي ولحم مفتاح وإسماعيل
وجراح فريد والعسكري
عامر وستوتة وسُليَم وأهات خليل
فاطمة .. نجاتي .. فؤاد .. نبيل
ووجع حسين ولويس وعثمان الجميل
تاريخ ودم جراح وجع
نيل من الأيام وم الزنانين
ومن تكادير وشوق
فيضان من العمال وم الأناشيد
وم الأوراق جدور حية وعروق
وأغنيات من جمر أشواق البشر
أشجار وأرض وفلاحين
أعمار م الحلم الجميل
أساطير ، حقوق ..
ما لكومش فيها يا صنايع الأمير
يا كتبة التقارير لتنظير المرق
يامدسوسين عمدا في ليل مالوش ضمير
يابدعة العصر الذليل
يا راضعين ذل الحياة جوه الشقوق
يا مدفوعين الأجر
م اللي يدفعوا لمين يركعوا
يامحنطين الجثة بحماس
لجلن بصيتها تجعجعوا
الساحة خليت برطعوا وتلمعوا
من لحمنا الحي اشبعوا
ما أشنعه بؤس المصير
مهما خرجتم ع الشاشات تتنطعوا
هذا السراب ما أخدعه في ليل الموات ..
الحزب مات يوم أنخرس صوت الشهيد
نطقت حسابات السكات مات واندفن في قلوبنا
يوم يغفر ذنوبنا .. نرجعه
ولحد ما يؤؤن الأوان أتذكروا
يالي رقصتم يوميا قدام دفنته
وساومتوا أعداء الوطن علي جثته
وقتلتوا بعض علي الميراث يوم خرجته
لموا الخرابيش واحذروا
إياكو والاسم العظيم باسمه العظيم تتقنوا
ياعاجزين تتطهروا
كدب اللصوص ما أجرمه وما أخدعه
مالهش رجالين من هوانكم ، ترفعه
وخصوصي لما يكونوا أمثالكم
من أول الأول – خناجر مصرعه..

صور افندية

صور أفندية
كانوا فلاحين من بلدنا
عارف أساميهم
عزقوا معايا
غيطان الحزن والرزقة
جاملوني ف حصاد القمح
وهونوا الجرح
لما يونيه غدرتني
خدوا بأيديه
أما سكك الغربة سرقتني
وغربتني الهموم
استغربتني المدن
هجرتني في المواويل
وضي القمر
حاصرتني قلل العطش
أنكرني ضل الشجر
يوم شح عني الماء
حين تاهوا مني

في زحمة الأسواق
وقفت أرسم علي صدري
وعلي الأوراق
حروف أساميهم الحرة
اهتف لهم
أحلف لهم بيهم
كتبت فيهم أغاني
عل إيقاع النيل
لكنهم أنكروني
في عز عز الشمس

عينى فى عينهم
وصوتي لم يشله اليأس
ياحسرتي من سنين
تحت الجفون مرة
كانت صورهم هية
ومش هية
ناديت عليهم ياولاد الناس
أنا عقلي عمره
ما خالف الإحساس
لقيتني ميت حماس
بانسي أساميهم
ريقي نشف
حلقي جف – أتاريهم
ركبوا خيول الحرس
لبسوا أفندية
وهملوني
ورمحوا في الزحام عني
وشمتوا فيه أما شافوني
شقف أشلاء

كانوا فلاحين
بالكثير فيهم صنايعية
قريبين المصاطب
عتبة الشبابيك
القلب أبيض
و الهدوم لكاليك ..
والضحكة م القلب
بتخف المخاوف فيك
عرفتم منين إن حرق الدم
بقي غية
والغدر حتمية
في شرع العسكر المماليك
والصبر أطيب
م النخيل والطين
جميع ذنوبهم
أصبحت تلاكيك
حجج وليها إثباتات
ثابتين
ولها ف خيال المذنبين
تفانين

أتفننوا ساقوا فيها
هندسوا العمة
لبسوا أفندية عمد
وأتقنوا التكتيك

من أجل أن يلعبوا

لليسار در

لليسار در
الست حميدة اليسارية
كانت في زمان سوفيتية
علشان كان جوزها سوفيتي

*
دلوقتي بقت متخطية
كل التفاهات الفكرية
كل الأوهام الكتاكيتي

*
والحلقة بتشد الحلقة
ما الطبقة ما بقتش الطبقة
وخبيز أمها ما بقاش بيتي

*
عقبال عندك فيه دولارات
من كردستان للعياط
بشيكات ع البند الفتافيتي

*
ما الحزب اتنتفت جناحاته
واتكعبل في حبال خلافاته
بحساب تكتيكي وتخطيطي

*
ولهذا كله – ولذلك
سخطونا .. أهلي وزمالك
بسياسة جدورها عفاريتي

*
ترميك ع الضفة المضمونة
تلعب بالورقة المأمونة
إبرتي .. وأنا لا ضماها في خيطي

*
أنا عمري أوربه وحويطة
لابساها آوية وتحويطة
وبكيفي باختيار برانيطي

*
ولأني ست وسياسية
بارفع شعارات الحرية
ثورية بمزاج هلافيتي

*
ده حزبنا وإحنا الوراثينه
بمزاجنا و ح نطلع عينه
ما هو كل الأحلام حواديتي

*
جت لك ع الطبطاب يا حميدة
الحالة ما بقشت فريدة
الكل بغرف سكيتي